Edhe pak ditë na ndajnë nga data, në të cilën mbarë bota islame përkujton lindjen e hz. Muhammedit (a.s), të dërguarit mëshirë për mbarë botërat. Me këtë rast, ditën e xhuma, më 11 shkurt 2011, Myftiu Imam Muhamed Sytari, ka mbajtur hytben e xhumasë në xhaminë e Parrucës, ku është ndalur te kjo datë e shënuar për mbarë muslimanët.

Gjatë fjalës së tij, Myftiu është ka folur mbi mrekullinë e mbrojtjes hyjnore, me të cilën është përkrahur gjatë jetës së tij profeti Muhammed (a.s). Gjatë hytbes, ai ka përmendur argumente të shumta që vërtetojnë se Zoti i gjithësisë e ka garantuar këtë fe të begatë deri në ditën e kijametit.

“Mos të shqetësohet njeri për fenë e Muhammedit (a.s), pasi atë e ka garantuar vetë All-llahu, Zoti i vetëm i gjithësisë! Mos të merakoset njeri për personin e hazreti Muhammedit (a.s), pasi atë e ka mbrojtur Vetë All-llahu! E, kjo do të thotë më shumë përgjegjësi për ne dhe më shumë angazhim për të ruajtur besën!”- ka deklaruar Myftiu në hytben e tij, e cila është filmuar edhe nga televizionet lokale të Shkodrës dhe Malësisë së Madhe.

Në përfundim të hytbes, Myftiu ka ftuar të gjithë besimtarët që të jenë të pranishëm në ceremoninë zyrtare me rastin e ditës së përkujtimit të të dërguarit mëshirë për mbarë botërat, që do të zhvillohet ditën e hënë, më 14 shkurt, pas namazit të iqindisë në xhaminë “Ebu Bekër”.