Mbrëmjen e së dielës, më 30 janar 2011, Myftiu i Shkodrës ka ftuar për një darkë miqësore drejtuesit kryesorë të tre komuniteteve fetare të Shkodrës.
Në rolin e mikpritësit, Imam Muhamed Sytari i ka uruar mirëseardhjen At Aleksandër Petanit, që shoqërohej edhe nga At Nikolla Petani. Pasi ka falënderuar drejtuesit më të lartë të Kishës Ortodokse për përgjigjen e ftesës dhe mundësinë e gjetur për të kaluar këtë mbrëmje sëbashku, Myftiu ka përmendur se kjo darkë shërben më së miri për të shprehur realitetin e marrëdhënieve në mesin e përfaqësive fetare në Shkodër.
           
Gjatë kësaj darke, drejtuesit e Myftinisë dhe ata të Kishës Ortodokse në Shkodër kanë diskutuar për çështje të ndryshme që kanë të bëjnë me zhvillimet fetare në vend e përtej tij. Krerët e dy institucioneve kanë qenë të mendimit se takime të tilla e afrojnë edhe më tepër shpirtin e bashkëpunimit në mes të institucioneve fetare në Shkodër, për të ofruar zgjidhje të përbashkëta për shumë çështje që shqetësojnë sot rininë, familjen, masat e gjera të shoqërisë. Ata kanë rënë dakort që të shpeshtohen kontaktet në mënyrë të rritet fryma e bashkëpunimit dhe harmonisë ndërfetare në mes të përfaqësuesve të dy komuniteteve më të mëdha fetare në Shqipëri, atij musliman dhe atij ortodoks.
           
Darka, që është ndjekur edhe nga media, ka qenë një dëshmi e sinqertë e një fryme konstruktive të përpjekjeve për të ruajtur një traditë të pasur fetare e kombëtare të vendit tonë, që është pikërisht harmonia dhe bashkëpunimi në mes të komuniteteve fetare.
           
I pyetur nga media për një mesazh në lidhje me këtë darkë, Myftiu është përgjigjur: “Mesazhi më i mirë është kjo që shihni me sytë tuaj!”           
Në këtë darkë, Myftiu shoqërohej nga teologu Arben Halluni.