Paraditën e së mërkures, më 26 janar 2011, Myftiu Imam Muhamed Sytari ka pritur në një vizitë zyrtare një përfaqësi zyrtarësh nga Bashkësia Islame e Malit të Zi, nën drejtimin e z. Omer Kajoshaj, sekretar për Marrëdhëniet me Jashtë, si dhe zotërinjtë Ismail Daciq, Fuad Cekiq dhe Muhammed Tevfik.
           
Gjatë vizitës, Myftiu i Shkodrës u ka uruar mirëseardhjen miqve nga Podgorica dhe ka theksuar se këto vizita shërbejnë më së miri për të afruar bashkëpunimin dhe harmoninë në mes të dy bashkësive fetare islame dhe rolin që ato kanë në shoqëri. Myftiu ka thënë se binjakëzimi në mes të Myftinisë Shkodër dhe asaj të Podgoricës, është një detyrim islam i vonuar, që duhet korrigjuar sa më parë në të mirë të marrëdhënieve vëllazërore që ekzistojnë në mesin e dy myftinive. Më pas, ai ka bërë një ekspoze të punës dhe aktivitetit të Myftinisë Shkodër dhe rolit që ajo ka në jetën e përditshme në Shkodër e përtej saj.
           
Nga ana e tij, z. Omer Kajoshaj, pasi ka falënderuar mikpritjen, ka theksuar se shkaku i kësaj vizite është pikërisht nxitja e bashkëpunimit të mëtejshëm në mes të dy myftinive dhe këmbimi i eksperiencave të frytshme në mes të imamëve dhe thirrësve islamë në këto treva. Ai e ka informuar Myftiun e Shkodrës edhe për ecurinë e Medresesë së re në Tuz dhe arritjet e saj për këtë vit. Njëkohësisht ai i ka dorëzuar Myftiut Imam Muhamed Sytari një ftesë zyrtare për të vizituar Podgoricën dhe Medresenë e Tuzit.
           
Pas vizitës në Myftini, përfaqësuesit e Bashkësisë Islame të Malit të Zi kanë bërë edhe disa vizita në institucionet fetare në Shkodër, ku janë ndalur te xhamia e Tophanës, Medreseja e djemve, xhamia e Medresesë, xhamia e Parrucës dhe xhamia “Ebu Bekër”.
           
Për nder të miqve nga Podgorica, Myftiu ka shtruar një drekë, ku kanë qenë të pranishëm edhe disa nga imamët e Myftinisë Shkodër.