Pasditën e së martës, më 18 janar 2011, Myftiu Imam Muhamed Sytari ka inspektuar xhaminë e fshatit Drisht dhe pronat vakëf të kësaj zone, si dhe xhaminë e kalasë së Drishtit dhe vakëfin e saj.
           
Fillimisht në xhaminë e Drishtit, Myftiu ka parë nga afër situatën e rënduar të xhamisë së këtij fshati, që ka nevojë për një ndërhyrje të shpejtë për rindërtimin e saj, pasi gjendja aktuale është jo optimale për vijimësinë e kryerjes së adhurimeve në të. Gjatë këtij inspektimi, Myftiu ka kërkuar nga administrata e tij, interesim maksimal për çështjen e vakëfit të kësaj xhamie, duke theksuar se neglizhenca e deritanishme është një gjynah i madh, për të cilin fajtorët duhet të marrin hisen e turpit të kësaj gjendje mjerane të vakëfeve të muslimanëve në këtë zonë e përreth saj.
           
Më pas Myftiu është ngjitur edhe në kalanë e Drishtit, ku ka inspektuar nga afër zonën muslimane të kalasë dhe xhaminë e saj. Me këtë rast, ai është takuar edhe me banorë të kësaj zone dhe ka vizituar xhaminë e vjetëruar të kalasë së Drishtit.

“Teksa e shoh xhaminë e kalasë së Drishtit në këtë gjendje, e ndjej për obligim moral e fetar të kërkoj ndërhyrjen e menjëhershme për rehabilitimin e saj, para çdo xhamie, sepse kjo është një zonë e pastër islame, me një histori të vjetër! Detyra e jonë është të mos neglizhojmë këto zona dhe në veçanti xhaminë e kalasë së Drishtit, të cilën duhet të interesohemi ta kthejmë në një vend të vizitueshëm e të frekuentueshëm nga besimtarët. Kalaja e Drishtit dhe xhamia e saj, janë një amanet i shtrenjtë i gjyshërve dhe baballarëve tanë muslimanë, si dhe nj�� obligim fetar ndaj fëmijëve dhe brezave që po vijnë, që Islami të mos shuhet asnjëherë në këto troje të bekuara!”- ka theksuar Myftiu.