Pasdrekën e së mërkurës, më 12 janar 2011, Myftiu Imam Muhamed Sytari ka zhvilluar një takim me imamët e xhamive të dëmtuara nga përmbytjet e dhjetorit 2010, ku shumë zona vakëf janë përmbytur dhe janë dëmtuar në nivele të ndryshme.
           
Gjatë këtij takimi, Myftiu ka theksuar se shumë shpejt do të mundësohet pajisja e këtyre xhamive me tapet të ri, i cili do të mundësojë sadopak lehtësimin e situatës së krijuar nga gjendja e përmbytjes së ndodhur muajin e kaluar.
           
Ai ka dëgjuar edhe ankesat e imamëve në lidhje me gjendjen e vështirë të disa prej këtyre xhamive që janë dëmtuar më shumë se të tjerat, si xhamia e fshatit Kuç, që ka pësuar dëme serioze në muret e saj, xhamia e Plumbit, që është dëmtuar edhe në pjesën e çardakut të grave etj.
           
Gjatë këtij takimi, Myftiu është angazhuar për të bërë më të mirën për kapërcimin e kësaj situate të vështirë për xhamitë e dëmtuara dhe xhematet e tyre dhe ka theksuar se është detyrë e përbashkët të punojmë maksimalisht për të kapërcyer këtë situatë sprove në xhamitë tona të dëmtuara.
 

Ilir Dizdari
Imam i xhamisë Tophanë