Ditët e fundit, Myftinia Shkodër është angazhuar për të inspektuar pronat vakëf në territorin e Zonës Shkodër, duke verifikuar edhe shkeljet e paligjshme që janë konstatur ndër vite rreth tyre.
           
Ditën e mërkure, më 12 janar 2011, Myftiu i shoqëruar edhe nga administratori i Myftinisë Shkodër, ka inspektuar vijimin e punimeve në Qendrën Tregtare në pronën vakëf në Zdralej. Ai ka parë nga afër punën e bërë dhe ka dhënë udhëzimet përkatëse për mënyrën e shfrytëzimit të disa prej lokaleve në këtë pronë.
 
Gjithashtu ai ka parë nga afër edhe një pjesë të ozurpuar padrejtësisht të kësaj prone, e cila është nëpërkëmbur ndër vite falë edhe ndërhyrjeve burokratike të njerëzve me pushtet në këtë qytet. Në fjalën e tij, në lidhje me këtë fakt, Myftiu ka theksuar se: “Pronat vakëf janë të shenjta. Asnjë tolerim ndaj shkeljeve barbare të këtyre 20 viteve! Ata që kanë dorë në këtë barbari që ka ndodhur me pronat e muslimanëve, janë kriminelë dhe njerëz të ulët në syrin tonë!”
           
Më pas, Myftiu ka inspektuar edhe pronat e Myftinisë Shkodër në pallatin e ndërtuar nga firma “Faqa”, si dhe ka dhënë disa udhëzime për mënyrën e shfrytëzimit efikas të tyre.

Kleves Kraja