Të xhumanë e parë të këtij viti diellor, më 7 janar 2011, Myftiu i Shkodrës Imam Muhamed Sytari ka folur mbi rëndësinë e angazhimit të besimtarit musliman për të kuptuar rëndësinë e mëshirës hyjnore në jetën e tij.  

Gjatë fjalës së tij të mbajtur nga minberi i xhamisë së fshatit Melgushë Myftiu i është referuar edhe çthurrjes së madhe morale, politike e kulturore që po përjeton vendi ynë kohëve të fundit. Ai nuk ka lënë pa përmendur edhe faktin e turpshëm të projekt-ligjit për ndalimin e simboleve fetare në Shqipëri, ku ka thënë se: “Ky projekt-ligj i lig, nuk ka qëllim tjetër vetëm se zhveshjen e mëtejshme të shqiptarëve nga lidhja e tyre besnike dhe e pazëvendësueshme me Islamin! Nëse komunizmi ishte një pjesë e rëndësishme e kryqëzatës perëndimore ndaj muslimanëve në këtë vend, ajo që po dëgjojmë këto ditë është vazhdimësi e asaj fryme mbytëse që poshtëroi këtë komb e këtë vend të begatë!? Prandaj ne nuk jemi dakort me këtë mendim dhe e refuzojmë kategorikisht atë, kurdo qoftë e nga kushdo qoftë, sepse nuk bëjmë kompromise në hesap të fesë sonë për asgjë në këtë botë të përkohëshme!”
           
Më pas, në hytben e tij Myftiu ka hedhur dritë mbi ajete dhe hadithe që flasin mbi mëshirën dhe angazhimin e muslimanit për të qenë njeri paqësor dhe mbrojtës i të drejtave fetare e njerëzore, në shërbim të një jete plot mëshirë, dashuri e harmoni me veten, Zotin e tjetrin.
           
Pas namazit të xhumasë dhe virdeve përkatëse, Myftiu i është përgjigjur pyetjeve të disa besimtarëve në lidhje me disa zakone që kanë të bëjnë me jetën e përditshme dhe marrëdhëniet e njerëzve me njëri-tjetrin.

M. Hoxha