Nga data 30 dhjetor 2010 - 6 janar 2011, Myftiu i Shkodrës Imam Muhamed Sytari ka zhvilluar një vizitë zyrtare në Republikën Arabe të Sirisë, ku ka zhvilluar takime të shumta dhe të rëndësishme me personalitete të shquara të botës islame atje.
           
Gjatë qëndrimit të tij në Damask, Myftiu është takuar fillimisht me Kryemyftiun e Republikës Arabe të Sirisë, Hirësinë e Tij Shejkh Ahmed Hassun. Gjatë këtij takimi, ai ka bërë një ekspoze të punës që bëhet në Myftininë e Shkodrës, si dhe ka vënë në dukje disa nga vështirësitë që duhen tejkaluar në këtë drejtim. Njëkohësisht i ka përcjellur kryemyftiut sirian selamet e përzemërta të Kryetarit të Komunitetit Mysliman të Shqipërisë, H. Selim Muça.

“Sivjet festuam 20 vjetorin e rihapjes së xhamisë së parë në Shkodër dhe Shqipëri. Ky përvjetor është njëkohësisht një thirrje e fortë për ne për të përmirësuar punën dhe angazhimin në funksion të mirëprezantimit të Thirrjes Islame në vendin tonë”- ka theksuar Imam Muhamed Sytari.

Ndërkohë, Kryemyftiu i Sirisë, është angazhuar për të qenë në krah të zhvillimeve të reja në Myftininë e Shkodrës dhe Komunitetin Mysliman të Shqipërisë. “Shqipëria është vendi që është dhunuar më së shumti gjatë periudhës së komunizmit. Në veçanti muslimanët shqiptarë kanë provuar kryqëzatën komuniste, si pjesë e një përpjekje të ulët të fuqive perëndimore për shpëlarjen e identitetit islam të këtij vendi. Ky ka qenë misioni i komunizmit në vendin tuaj! Prandaj, është detyra e jonë të bëjmë atë që është më e mira për të qenë në krah të vëllezërve tanë shqiptarë në këtë kohë”- ka thënë ndër të tjera Hirësia e Tij. Më pas, ai ka kujtuar edhe disa nga takimet e tij me Hafiz Sabri Koçin, të cilin e ka vlerësuar si një njeri sakrifikues, me kontribute të çmuara në shërbim të kombit dhe fesë së tij.
           
Gjatë kësaj vizite, Myftiu i Shkodrës e ka ftuar zyrtarisht Kryemyftin e Sirisë për një vizitë në Shqipëri, ftesë që është mirëpritur nga Hirësia e Tij Shejkh Ahmed Hassun.
           
Në ditët e qëndrimit të tij në Damask, Myftiu ka takuar dhe ka zhvilluar takime të frytshme edhe me një sërë personalitetesh të rëndësishme të botës islame në Siri e përtej saj, si: Dr. Salahuddin Keftaro, Dr. Ratib Nabulsi, dekanin e Fakultetit të Thirrjes Islame, dr. Bessam Axhik etj, me të cilët ka diskutuar për problematikat e ndryshme që ka sot Thirrja Islame në Shkodër e Shqipëri, mënyrat e tejkalimit të tyre etj. Gjatë këtyre takimeve, Myftiu ka kërkuar ndihmën e botës islame për kontribuar më shumë në Shkodër dhe Shqipëri në shërbim të Thirrjes Islame dhe vlerave të saj, që qëndrojnë në themelet e vlerave shqiptare.
           
Një takim të veçantë, Imam Muhamed Sytari ka zhvilluar edhe me dijetarin e madh shqiptar, Hirësinë e Tij Shejkh Vehbi Sulejman Gavoçi. Gjatë vizitës së tij në shtëpinë e hoxhës së moshuar shkodran, Myftiu ka vlerësuar kontributet e çmuara që Hirësia e Tij ka dhënë për Islamin në Shkodër e Shqipëri dhe mesazhet ndërtuese me të cilat ai vazhdon të edukojë brezat e rinj të muslimanëve, nëpërmjet mësimeve dhe librave të shumtë që ka shkruar dhe vazhdon të shkruajë. Ai e ka informuar Hoxhën e ditur për ecurinë e aktiviteteve dhe zhvillimeve në Myftininë e Shkodrës, si dhe projektet e saj për të ardhmen e afërt dhe të largët.
           
Hirësia e Tij është interesuar për gjendjen e muslimanëve në Shkodër dhe Shqipëri dhe ka nxitur forcimin e vëllazërisë dhe bashkëpunimit në mes të hoxhallarëve dhe veprimtarëve të ndryshëm në fushën e Thirrjes Islame atje. Njëkohësisht, ai ka theksuar: “E kemi amanet këtë fe, prandaj mos ia ktheni shpinën për asgjë në botë! Qëndroni besnikë dhe kërkoni ndihmën e All-llahut sepse, Ai sheh, dëgjon dhe është në krah të besimtarëve!”.
           
Gjatë kësaj vizite, Myftiu i Shkodrës e ka ftuar zyrtarisht Hoxhën e Madh shqiptar Shejkh Vehbi S. Gavoçi për të vizituar vendlindjen e tij me rastin e Mevludit të Hazreti Muhammedit (a.s), ftesë që është mirëpritur nga Hirësia e Tij.           

Gjatë qëndrimit të tij në Damask, Myftiu është takuar edhe me disa drejtues të lartë të organizatave dhe fondacioneve bashkëkohore islame të vendeve arabe, prej të cilëve ka kërkuar mbështetje dhe përkrahje për imamët e Shkodrës dhe xhamitë e saj në kuadër të rritjes së kontributit të Myftinisë Shkodër në shërbim të besimtarëve dhe vlerave të Thirrjes Islame.