Ditën e shtunë, më 25 dhjetor 2010, Myftiu i Shkodrës Imam Muhamed Sytari, ka vizituar përfaqësuesit e dy kishave prezente në Shkodër, me rastin e Krishtlindjes.

Fillimisht, ai është ndalur në Kishën Ortodokse, ku ka uruar Atë Aleksandër Petanin me rastin e kësaj feste të shënuar për botën e krishterë. Në bisedën e tyre, është folur për vlerën e festave që bashkojnë njerëzit në sofrën e besimit dhe harmonisë qytetare. Myftiu ka theksuar se fryma e bashkëjetesës dhe harmonisë ndërfetare që ekziston në Shkodër duhet ruajtur e konsoliduar, duke tejkaluar çdo papjekuri, cytje e mungesë maturie në këtë drejtim nga kushdo.
           
Edhe Famullitari i kësaj kishe, pasi ka falënderuar rolin e Myftinisë për ruajtjen dhe përhapjen e mesazheve të paqes, harmonisë dhe bashkëpunimit në mesin e qytetarëve dhe besimtarëve, ka vlerësuar frymën e harmonisë në mes të përfaqësuesve të feve monoteiste në Shkodër e Shqipëri.
           
Më pas, i shoqëruar edhe nga imami i xhamisë “Ebu Bekër”, teologu Idmir Plaku, ai i xhamisë së Rusit, H. Fejzi Zaganjori dhe teologu Arben Halluni, Myftiu ka vizituar edhe përfaqësuesit e Kishës Katolike, ku ka bërë urimet me rastin e festës.
           
Edhe në këtë vizitë, Myftiu ka theksuar se harmonia fetare që ekziston në Shkodër e Shqipëri, duhet mbrojtur e konsoliduar duke u bazuar në tekstet e shenjta, urtësinë dhe maturinë e njerëzve të ditur. Ai ka vlerësuar rolin e institucioneve fetare në këtë vend për të qenë përcjellës së mesazheve të paqes dhe besimit në shoqëri.
           
Në mesazhin e tij për mediat, përveç urimeve drejtuar të krishterëve me rastin e festës së tyre, Myftiu është ndalur edhe te çështja e shumëfolur këto ditë, ajo e ndalimit të mbulesës së muslimaneve në shkolla e në administratë. Ai ka thënë se nëse një ligj i tillë do të miratohej, kjo do të ishte kthim prapa në mesjetë. “Kjo do të ishte më keq se realitetet e vitit 1967, ndërkohë që sapo janë liberalizuar vizat dhe njerëzit presin të udhëtojnë të lirë kudo në Evropë!? Do të ishte paradoksale, e turpshme dhe e pa pranueshme prej nesh!?”- ka deklaruar Myftiu.

Alban Hoxha