Ditën e xhuma, më 24 dhjetor 2010, Imam Muhamed Sytari ka mbajtur hytben e xhumasë në xhaminë e fshatit Bërdicë e Mesme. Në fjalën e tij, Myftiu ka folur mbi mënyrat e ruajtjes së identitetit islam, në këto ditë, duke iu referuar dashurisë për të dërguarin e All-llahut dhe pasimin e shembullit të tij në jetë.
           
“Ditët që jetojmë, po na vërtetojnë përherë e më shumë se sa e domosdoshme është për ne muslimanët që ta forcojmë edhe më shumë lidhjen tonë me fenë, dashurinë për All-llahun dhe të dërguarin e  Tij! Sot, kur nëpërmjet altoparlantëve të Iblisit, po bëhen thirrje për ta ndërruar fenë, ne si muslimanë e kemi për detyrë të qëndrojmë përballë kryqëzatës moderne që po lëvron ditë pas dite në këtë vend! Ne jemi muslimanë dhe nuk e ndërrojmë fenë, edhe pse ndonjë të djallëzuari do t’i pëlqente kjo gjë!

Ditët që po jetojmë, na nxisin edhe më shumë për t’u kapur pas traditave islame në gjurmë të Resulull-llahit (a.s) dhe shembullit të tij. Secili prej nesh duhet ta pyesë veten për shembulltyrën e jetës së tij. Muslimani e ka një të tillë, të vetmen shembulltyrë, Resulull-llahin (a.s).

Përtej politikanëve shpirtshitur, përtej pushtetarëve të konvertuar, përtej iblisëve që na thërrasin drejt vetes, ne e kemi një fe dhe një shembull: Islamin dhe Resulull-llahin (a.s)”- ka qenë thelbi i hytbes së mbajtur nga Myftiu.

Ndërkohë në hytben e dytë, ai ka folur edhe për përmbytjet e ditëve të fundit, ku është lutur për njerëzit në nevojë dhe të dëmtuarit. Ai ka konfirmuar se Myftinia Shkodër do të vazhdojë t’u vijë në ndihmë njerëzve në nevojë e atyre që u dëmtuan nga përmbytjet e frikshme të fillim-dhjetorit 2010.

A. Mahiri