Nga dita e djeshme ka mbërritur në Shkodër një përfaqësi e Organizatës Bamirëse turke “Cansuyu”, që është sensibilizuar me nevojën e njerëzve të dëmtuar nga uji në Shkodër. Me këtë rast ata kanë sjellur në qytetin tonë 2000 (dy mijë) pako ndihma ushqimore, shpërndarja e të cilave është bërë sipas një grafiku të përcaktuar nga Myftinia Shkodër.
           
Pas takimit të zhvilluar dje me Myftiun Imam Muhamed Sytari, është bërë edhe përcaktimi i zonave ku do të shpërndahen këto ndihma. Fillimisht Myftinia ka ngritur një grup vullnetarësh, të cilët janë marrë me grumbullimin dhe ndarjen në pako të ndihmave në fjalë.
           
Falë koordinimit me imamët e xhamive të përmbytura, është bërë edhe planifikimi i zonave ku do të shpërndahen këto ndihma. Me këtë rast, është bërja shpërndarja e 470 pakove me ndihma ushqimore në fshatin Trush, sipas një liste të përgatitur me shumë seriozitet nga këshilli i xhamisë, duke përfshirë krejt familjet e këtij fshati, muslimanë e katolikë.
           
Po ashtu është bërë shpërndarja e 100 pakove në  Zogaj, ku siç dihet edhe aty ka patur dëme të shkaktuara nga dallgët dhe era e fortë e ditëve të fundit.
           
Ndërkohë, Myftinia po përgatitet për të bërë shpërndarjen e ndihmave në disa zona tjera,  të dëmtuara nga përmbytjet.
           
Me këtë rast, Myftinia Shkodër, falënderon përkushtimin dhe sakrificën e grupit të vullnetarëve, të cilët ndonëse në kushte të vështira atmosferike, u angazhuan për përgatitjen e pakove që u shpërndanë në Trush e Zogaj.