Fshati Kuç është një ndër zonat më të dëmtuara nga përmbytja që izoluan Shkodrën gjatë ditëve të para të muajit dhjetor 2010. Interesimi i Myftinisë për të ndihmuar njerëzit në nevojë e të dëmtuar nga këto përmbytje ka qenë i menjëhershëm. Është sensibilizuar opinioni publik, besimtarët dhe frekuentuesit e xhamive, janë mbajtur vase e hytbe në këtë drejtim, janë ftuar organizata e shoqata besimtare për të ndihmuar dhe janë hapur llogari bankare për të mbledhur sa më shumë fonde bamirësie për këtë qëllim. Dëme të mëdha janë bërë edhe në fshatin Zues, por edhe në Muriqan, ku ka patur njerëz që janë dëmtuar nga uji.
           
Paraditën e së mërkures, më 15 dhjetor 2010, Myftinia Shkodër ka bërë të mundur sigurimin e qindra pakove për të ndihmuar sadopak të dëmtuarit nga uji në fshatrat Kuç, Zues e Vukatanë.
           
Fillimisht, në fshatin Kuç, është bërë shpërndarja e 170 pakove për familjet që u dëmtuan në këtë përmbytje. I pranishëm në këtë aktivitet bamirës, Myftiu i Shkodrës ka inspektuar nga afër edhe xhaminë e dëmtuar të këtij fshati. Ai ka parë dëmet e shumta që ka bërë vërshimi i ujërave dhe nivelet e dëmit nga janari i këtij viti deri në përmbytjen e fundit. Besimtarët janë ankuar se dëmi që ka ndodhur ka bërë që xhamia të shkojë drejt shkatërrimit dhe kanë kërkuar ndihmën e institucionit të Myftinisë në këtë drejtim.
           
Më pas, Myftiu është takuar edhe me besimtarë e familjarë të dëmtuar, me të cilët ka ndarë lutjet e shpresës dhe ka theksuar se detyra e krejt komunitetit në këto momente të vështira është bashkëpunimi për tejkalimin e kësaj situate sa më parë.
           
Pas fshatit Kuç, Myftiu ka inspektuar edhe xhaminë e fshatit Zues, si dhe është takuar edhe me një pjesë të komunitetit të dëmtuar në fshatin Muriqan, ku ka bërë edhe shpërndarjen e pakove ushqimore për njerëzit në nevojë.

V. Mehmeti