Pasdrekën e së martës, më 14 dhjetor 2010, në Myftininë e Shkodrës ka mbërritur nën/kryetari i Komunitetit Mysliman të Shqipërisë, z. Bujar Spahiu, i shoqërur nga drejtori i Drejtorisë së Arsimit në K.M.Sh, z. Altin Shima, si dhe Myftiu i Elbasanit, z. Agim Duka, të cilët janë pritur nga Myftiu Imam Muhamed Sytari dhe stafi i kësaj Myftinie.
           
Gjatë vizitës së tyre, drejtuesit e lartë janë informuar për situatën e krijuar në Shkodër gjatë përmbytjeve të shkaktuara nga fillimi i dhjetorit. Ata kanë përcjellur selamet dhe lutjet e Kryetarit të Komunitetit Mysliman të Shqipërisë, H. Selim Muça në lidhje me situatën e këtyre ditëve.
           
Më pas, ata kanë bërë edhe një vizitë në zyrën e Prefektit të Shkodrës, z. Maxhid Cungu, ku kanë dhënë mesazhet e tyre me rastin e përmbytjeve në Shkodër.

Në fjalën e tij, nën/kryetari Spahiu ka theksuar se Komuniteti Mysliman i Shqipërisë është mobilizuar për të dhënë ndihmën e tij në këtë situatë. “Sot, sollëm edhe 10 ton ndihma të tjera ushqimore në ndihmë të njerëzve në nevojë, së bashku me Myftininë e Elbasanit, që sikurse krejt myftinitë e Shqipërisë, është sensibilizuar me këtë që po kalon Shkodra”- ka thënë z. Spahiu.  

Ndërkohë, Myftiu i Elbasanit, z. Agim Duka ka thënë se detyra e jonë si muslimanë është të angazhohemi për të dhënë ndihmën tonë aty ku njerëzit kanë nevojë. Prefekti i Shkodrës, z. Maxhid Cungu, pasi ka falënderuar përfaqësuesit e Komunitetit Mysliman, ka theksuar se situata po përmirësohet dita-ditës dhe se roli kryesor i krejt faktorëve që ndihmuan dhe po ndihmojnë në këtë situatë është për t’u falënderuar.