Paraditën e së hënës, më 13 dhjetor, përfaqësues të lartë të Shoqatës “Istanbul”, z. Rafet Bilaç, z. Arif Qerozi, z. Shuajb Bashhan etj, kanë vizituar Myftininë e Shkodrës, me rastin e përmbytjeve të ditëve të fundit, ku janë dëmtuar edhe shumë xhami në qytet e fshat.
           
Me këtë rast Myftiu Imam Muhamed Sytari ka uruar mirëseardhjen e drejtuesve të shoqatës “Istanbul”, duke theksuar se kontributi i saj është i madh dhe jetik për Myftininë dhe jetën e Thirrjes Islame në Shkodër. Ai nuk ka lënë pa falënderuar edhe kontributin e madh që kjo shoqatë ka dhënë me rastin e Kurban Bajramit të këtij viti, ku janë shpërndarë me qindra pako mishi për familje të shumta në Shkodër dhe përreth saj.
           
Në fjalën e tij, z. Rafet Bilaç, pasi ka përcjellur edhe selamet e dijetarit të shquar Osman ef. Nuri Topbash, ka theksuar se ndihmat e vëllezërve nga Turqia kanë nisur që në ditët e para të përmbytjeve dhe do të vazhdojnë edhe më tej. Ai ka garantuar se “Istanbul” dhe stafi i saj do të vazhdojnë të japin kontributin e duhur për të ndihmuar në realitetet e Thirrjes Islame në Shkodër.           

Në këtë takim merrnin pjesë edhe imamë të xhamive të përmbytura dhe pjesëtarë të Këshillit të Myftinisë Shkodër dhe të Shtabit të Emergjencave të kësaj Myftinie.