Mbrëmjen e së martës, më 7 dhjetor 2010, Myftiu I Shkodrës Imam Muhamed Sytari ka qenë i ftuar në studion e Tv ABC News, në Shkodër, ku ka folur për situatën e fundit të shkaktuar në Shkodër si shkak I përmbytjeve të ditëve të fundit.
           
Duke iu përgjigjur pyetjeve të gazetares, ai ka konfirmuar edhe një herë se situata e krijuar në qytetin e Shkodrës gjatë ditëve të fundit është ndër më dramatiket që ka kaluar ky qytet në historinë e tij. Ai ka rrëfyer edhe një momente të caktuara të emocioneve të marra nga takimi i tij me banorë të përmbytur gjatë shpërndarjes së ndihmave, në këto ditë të përmbytjes.
           
Ai nuk ka lënë pa përmendur edhe nevojën e madhe që kanë banorët e dëmtuar nga kjo situatë për një mbështetje shpirtërore, ku ka evidentuar rolin e Myftinisë Shkodër për ofruar ndihmën e saj në tejkalimin e kësaj situate të shkaktuar në qytet pas përmbytjeve të fundit.
           
Në përgjigje të pyetjes në lidhje me zhurmën që ka shkaktuar një deklaratë e tij gjatë hytbes së xhuma, se njerëzit po jetojnë një moment largimi nga feja si në vitet 1967, ai ka thënë, se kjo situatë është mbi të gjitha një zile e fortë për të zgjuar vëmendjen e shoqërisë shqiptare, që dita-ditës po i kthen shpinën Zotit dhe mësimeve të Tij. Ai ka konfirmuar edhe një herë se askush nuk ka të keqe nga besimi dhe feja dhe se është i distancuar qëllimet e disa të përditshmeve dhe ngjyrosjes politike që i është bërë deklaratës së tij, ku është përmendur edhe kryeparlamentarja e vendit. Gjatë fjalës së tij, Myftiu ka bërë thirrje që njerëzit të kthehen nga besimi dhe mos t’i kthejnë shpinën Zotit!

Njëkohësisht ai ka konfirmuar se roli i Myftinisë Shkodër do të jetë përherë pararojë në ruajtjen dhe kultivimin e harmonisë ndërfetare dhe paqes sociale në qytetin e Shkodrës dhe përtej tij, për shumë arsye.