Ditën e dielë, më 5 dhjetor 2010, menjëherë pas shpërndarjes së ndihmave për disa nga familjet e izoluara nga uji, në lagjen Xhabiej, Myftiu i Shkodrës Imam Muhamed Sytari ka bërë një vizitë në Shtabin e Emergjencave Civile në Prefekturën e Shkodrës.
           
Me këtë rast ai është takuar me zv/kryeministrin  e Shqipërisë, z. Ilir Meta, me të cilin ka folur rreth situatës së krijuar ditët e fundit në qytetin e Shkodrës, pas përmbytjeve që dëmtuan një pjesë të mirë të hartës së këtij qyteti. Ai i ka shpjeguar zv/kryeministrit se Myftinia Shkodër është e angazhuar për të dhënë ndihmën e saj përkrah qeverisë shqiptare dhe Shtabit të Emergjencave të ngritur pranë Prefekturës së Shkodrës. Nga ana e tij z. Ilir Meta ka falënderuar kontributin e Myftinisë Shkodër dhe ka konfirmuar domosdoshmërinë e bashkëpunimit për kapërcimin e kësaj situate. “Edhe ne po lutemi”- ka pohuar z. Meta, teksa Myftiu ka thënë se është e rëndësishme të mos humbet shpresa dhe besimi në Zotin.
           
Më pas Myftiu ka zhvilluar një bisedë edhe me Prefektin e Shkodrës, z. Maxhid Cungu, ministrin e Arsimit, z. Myqerem Tafaj e të tjerë pjesëtarë të shtabit të ngritur në qytetin e Shkodrës për kapërcimin e situatës së përmbytjeve të ditëve të fundit.
           
Gjatë fjalës së tij, Myftiu ka konfirmuar nevojën e kthimit nga Zoti me falje, pendim e lutje. Njëkohësisht ai ka bërë thirrje që klasa politike duhet të angazhohet me situatën e Shkodrës, jo me deklarata të pakuptimta që nuk kanë të bëjnë me këtë çështje.           

Ai ka garantuar se Myftinia Shkodër do të vazhdojë të japë kontributin e saj për të zbutur sadopak dhimbjen që po shkakton ky realitet.