Paraditën e së dielës, më 5 dhjetor 2010, Myftinia Shkodër ka organizuar shpërndarjen e disa ndihmave për njerëzit e izoluar nga përmbytjet e ditëve të fundit të ndodhura në qytetin e Shkodrës. 

I pranishëm në shpërndarjen e pakove ushqimore dhe ujit të pijshëm, ka qenë edhe  Myftiu i Shkodrës Imam Muhamed Sytari. Përpara kamerave të televizioneve të pranishme, ai ka bërë thirrje për solidarizim të mëtejshëm me njerëzit në nevojë të izoluar nga uji  e të përmbytur gjatë ditëve të fundit. Me këtë rast ai ka falënderuar shtetin shqiptar dhe Shtabin e Emergjencave pranë Prefekturës Shkodër për angazhimin maksimal në shërbim të njerëzve në nevojë. Ai ka theksuar se është koha që të gjithë të kthehemi nga Zoti dhe të lutemi me sinqeritet për këtë që po ngjet në vendin tonë gjatë këtyre ditëve të vështira.

Gjatë takimit me njerëzit e izoluar, Myftiu ka nxitur optimizëm e shpresë dhe ka kërkuar nga banorët e këtyre zonave që most a humbin shpresën dhe besimin në Zotin. Ai ka kërkuar që secili të lutet me pastërti për këtë situatë të vështirë për të gjithë.